مر على جواز مصطفى وريهام أربع شهور ولسه
ريهام ما حملتش، وطبعا الأسئلة نازلة زي الرز هي مراة مصطفى لسه مفيش حمل، هي
اتأخرت كده ليه، طيب هي كشفت، وطبعا كل اللي بيسأل مش بينسى يسأل هي شذى لسه ما
اتخطبتش، هي بقى عندها كام سنة، طيب هي مش مرتبطة بحد، طبعا دي الاسئلة اليومية
اللي انا وامي وابويا بنتعرض لها من يوم جواز مصطفى. حاجة سخيفة جدا لما تحس ان
حياتك الشخصية مشاع وكل الناس بتدي لنفسها الحرية انها تتدخل فيها. يعني كوني
اتخطب او لأ يخص غيري في ايه، كون مراة مصطفى تحمل أو لأ تخص حد غير مصطفى ومراته
في ايه. كمية التدخلات اللي بتحصل في حياة الواحد بتخنقه
وأكيد طبعا أنتم كمان بتسألوا نفس الأسئلة،
طبعا أصل التدخل في شئون الناس دا طبع، بس عموما أنا مش عارفة أخبار مصطفى ايه،
انا لسه في الكلية ما روحتش البيت، وماما لسه في الشغل هي كمان.
السويس بيت مصطفى
ريهام: على فكرة يا مصطفى أنا عايزة انزل القاهرة
مصطفى: خير يا ريهام في ايه
ريهام: محتاجة انزل اتابع الرسالة بتاعتي وعايزة اروح المكتبة
كمان
مصطفى: بس يا ريهام السفر الكتير خطر على حملك دلوقتي، ما
تستني شوية حتى الحمل يثبت
ريهام: انت مش ناوي تقول لأهلك على الحمل، مامتك كل يوم تتصل
وتسأل على الحمل لما أعصابي تعبت، حتى ماما بقى دا السؤال الرسمي لدرجة طلبت
انزل القاهرة عشان تحدد لي ميعاد مع دكتور تعرف سبب تأخير الحمل
مصطفى: بصي أصلا موضوع حملك أو عدمه دي حاجة تخصنا، وبعدين لو
عرفوا ح يعملوا ايه، مامتك ح تفضل قلقانة عليكي لغاية الولادة وكل شوية ح تقولك
انزلي اقعدي معايا، وماما ح تنشر الخبر، وانتي لسه يا دوب في اخر التاني. استني
خلصي التالت وبعد كده نقول. محدش له عندنا حاجة، واللي يضايقك أنا ح أرد عليه
ريهام: يعني انت شايف كده يا مصطفى
مصطفى: كده أحسن وبعدين هو أنا مش كفاية عليكي ولا ايه
ريهام (وهي بتحضنه): انت حبيب قلبي، بس الرسالة، ح اعمل فيها ايه
مصطفى: الدكتور قال السفر مش كويس عشانك، اصبري شهر كمان،
واللي تعوزيه خلي شذى تعمله لك، مش ح تقولك لا، ما انتي عارفاها، عمرها ما رفضت
تعمل خدمة لحد، ما بالك انتي صحبتها ومراة اخوها كمان
ريهام: خلاص اللي تشوفه يا حبيبي، ياله بقى عشان تاكل وتعملنا
الشاي
------------------------------------------------------------------------
البنك في مكتب فريد
فريد (بيتكلم في الموبايل):
-ايه يا فريال مالك؟
-يوووووووووووووه مش ح نخلص من موال العرسان دا
يا فريال ما انتي عارفة اني اتنيلت بطلت خروج وبقيت بحوش عشان اعرف اجي اتقدم
لابوكي بس لسه مش معايا حتى حق الشبكة، الشقة خلاص قدمت في شقق البنك ووافقوا اني
اشتري شقة بالتقسيط، فاضل الشبكة
-بتعيطي ليه دلوقتي، خلاص، ربنا يسهل
فريد (مستغرب): ماما؟! انتي هنا من امتى؟
أم فريد: من بدري من أول موال العرسان، ممكن تفهمني كل حاجة بقى
فريد: مفيش حاجة، خير مش بعادة تيجي المكتب يعني؟
أم فريد: انت اللي اتاخرت على ميعاد الانصراف قلت اجي اشوف في
ايه عشان نروح مع بعض، أنا قاعدة مش ماشية لغاية ما أعرف كل حاجة ومين هي فريال؟
فريد: مفيش يا ست ماما ولا أقولك يا حضرة المديرة
أم فريد: ما تغيرش الموضوع خلاص انتهينا وأنا مستنية
فريد: ماشي، بصي من الآخر كده فريال دي كانت زميلتي في
الكلية بس أنا عرفتها وأنا في البكالوريوس وهي كانت في سنة أولى ومن حوالي سنة قبل
جواز مصطفى قابلتها هنا في البنك واتكلمنا ومن ساعتها قربنا من بعض واتفقنا على
الجواز، وأنا قدمت على شقة من شقق البنك واتوافق عليها خلاص والمشكلة ان المقدمة
اخدت مبلغ كبير وطبعا مش ح اعرف اجيب الشبكة، وبابا طبعا لو ح يدفع مش ح يوافق على
الجوازة يبقى لازم استنى. المشكلة انها زي اي واحدة بيجيلها ناس يتقدموا وباباها
مستغرب رفضها المستمر دا ومصر على العريس الأخير. بس كده
أم فريد: انت محوش كام من حساب الشبكة، وعامل حسابك على الفرش
ازاي، أنا عارفة انك استلمت الشقة ودفعت كل الفلوس اللي انت حوشتها
فريد: مش عارف ح أفرش ازاي، وطبعا مفيش ولا مليم فاضل للشبكة
أم فريد: طيب بص بقى، في جمعية بعملها عشان حد من زمايلنا مراته
ح تعمل عملية كبيرة هو ياخد الأول وانت التاني وح تلتزم بالدفع وتاخد المبلغ دا
للفرش والشبكة، ولغاية ما تقبض الجمعية الشهر اللي بعد الجاي، ح اسلفك فلوس هدية
صغيرة تجيبها معاك للعروسة ولو العروسة عجبتني مش ح اخدهم منك. اتفقنا، حدد ميعاد
معاهم وأنا ح أقول لأبوك وما تجيبش سيرة انك مش معاك فلوس فاهم.
فريد (بيحضن أمه قوي): ما اتحرمش منك أبدا يا ست الكل، ربنا ما يحرمني، ح
أكلمها حالا
--------------------------------------------------------------------------
بيت فريال
فريال: ماما فريد كلمني وقالي لي أحدد ميعاد معاكم عشان يجيب
أهله ويجيوا
أم فريال: أخيرا اتحرك، خلاص أنا ح أكلم أبوكي وأقوله وربنا يستر
فريال: ليه يا ماما؟
أم فريال: انتي ناسية ان العريس الأخير دا عاجب أبوكي ازاي، وهو
مقتنع بيه ومش عارف انتي رافضة ليه
فريال: هو بابا ممكن يرفض فريد؟
أم فريال: سيبيها على الله يا فريال، أنا ح أكلمه وأشوف ح يقول
ايه؟
فريال (بقلق): ربنا يستر، يا رب يوافق
------------------------------------------------------------------------
مكتب المعيدين كلية الإعلام
شذى: شفت اللي حصل يا أمير
أمير: خير يا رويتر في ايه
شذى: الدكتور الجديد اللي جه من الإعارة
أمير: ما له يا شذى؟
شذى: طلع قريب فؤاد النجار عضو مجلس الشعب، لا وايه كمان
طلع تخصص جواز طالبات من الكلية سنة ويطلقها ويتجوز غيرها
أمير: انتي عرفتي منين؟
شذى: مفيش يا سيدي، عارف صفاء اللي اتجوزت ايمن النجار
أمير: أيوة، أنا كنت مستغرب أصلا جوازها منه، بس الغريب انها
اتجوزته ووافقت على استهتاره
شذى: عادي الحب أعمى
أمير: حب ايه، انتي تعرفي حاجة
شذى: اه كانت اتكلمت معايا قبل كده واخدت رايي في جوازها
منه، عشان بتحبه
أمير: وانتي وافقتيها ليه بس.
شذى: البنت بتحبه وكانت عايزة حد يوافقها انها تتجوز خلاص هي
حرة، نرجع لموضوعنا. صفاء قالت لي على المصايب دي إنها عرفتها من حماتها
أمير: مفيش فايدة فيكي، أكتر واحدة بتحارب تدخل الناس في
حياة بعض مش قادرة ما تتدخليش في حياة غيرك، دكتور محمد هو حر طالما محدش اشتكى خلاص.
بطلي تتدخلي في حياة الناس، ح تتعبي يا بنتي
شذى: ماشي يا عم الحكيم، عامل ايه مع نورهان خطيبتك
أمير (وهو بيضحك): وانتي مالك؟
شذى: بطل رخامة بقى
أمير: أنا سيبت نورهان وفسخت الخطوبة
شذى: ليه كده حرام انتوا بتحبوا بعض
أمير: مين اللي قالك اننا بنحب بعض
شذى: أومال اتخطبتوا ليه
أمير: عادي يا شذى كنت بحب واحدة وواضح انها مش حاسة بيا
عشان كده قلت أجرب حظي مع غيرها بس مش قادر انساها
شذى (باستغراب): أنا أول مرة أسمع منك الكلام دا، طب ليه ما صارحتش
اللي بتحبها بحبك ليها وعرضت عليها الارتباط؟
أمير: كنت خايف ترفضني
شذى: حقها يا أمير انها توافق أو ترفض بس عموما اعرض عليها
الأمر وهي حرة بدل ما تحب على نفسك وهي مش عارفة ويا عالم يمكن تكون بتحبك هي كمان
أمير: أنا بحبك انتي يا شذى
ليست هناك تعليقات:
إرسال تعليق