منزل أمير
أمير في البيت أجازة بيفتكر ازاي بعد عن لورا
بعد ما حس ان شذى متضايقة منها، وازاي لورا كانت بتحاول تقرب منه. وافتكر الحادثة
اللي حصلت له ووقفت شذى جنبه، وشكه فيها مع محيي جارهم وندمه على الشك دا، وحس
بقشعريرة لما افتكر اعتراف شذى بحبها له، عيد جوازهم فاضل له اسبوعين، وهو عايز
يحضر لها مفاجأة عشان يحتفلوا بيه. فتح اللاب بتاعه عشان يدخل اونلاين على أي شركة
سياحة ويسافروا يقضوا عيد جوازهم بره، اللاب بتاعه بيفتحه مش عايز يشتغل، حاول
معاه برضه مش عايز يشتغل. بص شاف اللاب بتاع شذى موجود وما اخدتهوش معاها الكلية،
فتحه يدخل من عليه على شركة السياحة ويحجز السفر.
فتح أمير اللاب وفتح منه الفيسبوك عشان يدخل
علي حسابه لقى شذى عاملة دخول تلقائي على الصفحة بتاعتها، ما قدرش يقاوم يشوف
الصفحة عندها ويفتح الاصدقاء والصور ومن غير ما يحس ايده راحت على البريد الوارد
لما شاف رسايل غير مقروءة عندها جت أول لما ظهرت شذى اونلاين واتفحت الرسالة من
"ابو علي"
أبو علي: ايه يا جميل فينك من امبارح مش لاقي
حد اتكلم معاه
نص الرسالة استفزه انه يشوف الموضوع من
البداية، مستفز مين اللي بيكلم مراته بالشكل دا
أبو علي: ممكن أتعرف على حضرتك
شذى: حضرتك تعرفني عشان تكلمني؟
أبو علي: انا عايز اسال حضرتك على حاجة بخصوص الصفحة بتاعتك
الخاصة بمناقشة المشاكل الاجتماعية، عند حضرتك وقت
شذى: أكيد طبعا اتفضل
أمير بدأ يشوف باقي الحوار لغاية لما وصل
لحوار استفزه قوي
أبو
علي: مالك؟ في ايه؟
شذى: مفيش مخنوقة شوية
أبو علي: فيه ايه، ممكن تحكي لي
شذى: مفيش متضايقة شوية حصلت مشكلة النهاردة بيني وبين
حماتي
أبو علي: خير في ايه
شذى: هي انتهزت فرصة ان زوجي مسافر وكلمتني عشان تجوزه
واحدة قريبتهم وعايزاني اقنع جوزي بكده
أبو علي : ؟؟؟؟؟؟؟؟؟؟؟؟؟؟؟؟؟؟؟؟؟؟
شذى: مش فاهم ايه؟
أبو علي: عايزة تجوزه ليه؟
شذى: عشان أنا مش بخلف
أبو علي: وهو رد فعله ايه
شذى: هو مسافر وما يعرفش حاجة لغاية دلوقتي
أبو علي: هو راجع امتى؟
شذى: النهاردة بالليل
أبو علي: خلاص لما يرجع عرفيه ماماته قالت لك ايه وشوفي رد فعله
شذى: أكيد مش ح يوافق
أبو علي: أكيد ليه؟
شذى: عشان هو بيحبني قوي
أبو علي: وانتي بتحبيه
شذى: قوي فوق ما انت ممكن تتصور
أبو علي: خلاص يبقى أكيد ح يتصرف كويس، هو متعود يسيبك ويسافر
كتير؟
شذى: ساعات عشان ظروف الشغل، وساعات أنا اللي بسافر
استغرب أمير من موضوع رغبة أمه انها تجوزه
قريبتهم عشان موضوع الأولاد، وخصوصا انها ما اتكلمتش معاه فيه من ساعة لما شد
معاها عشان خاطر ما تتكلمش فيه مع شذى وتجرحها، لأنه بيحب شذى جدا، وكمل تقليب في
الرسايل
أبو علي: انتي رقيقة قوي
شذى: انت أرق والله
أبو علي: حليتي مشكلتك مع جوزك، أخبار العلاقة الزوجية بينكم
ايه؟ اوعي يكون منفض لك
شذى: هههههههههههههههههههههههههههه، اتلم
أمير دمه غلي من الرسايل قفلها وهو مش عارف
يعمل ايه، اخر حاجة ممكن انه يتخيلها ان مراته تهزر كده مع ناس غريبة وكمان ما
تعرفهاش. قفل الرسايل وبعد كده بدأ الشك يلعب بيه ومش عارف يعمل ايه، فتح الرسايل
تاني وقلب فيها كلها لقى كلامها كله مع ناس كتير كده وبتتكلم وبتهرج في حاجات ما
ينفعش ان واحدة ست تتكلم فيها مع راجل ودمه
غلي وبقى مش عارف يعمل ايه، مسك الموبايل اتصل بيها وحاول يبان هادي وكأن مفيش
حاجة خالص
-الو، شذى انتي فين؟
- ح تتأخري بره؟
-لا أنا ما خرجتش النهاردة أنا أجازة
-طيب، ما تتأخريش
قفل السكة معاها وهو بيغلي ومش عارف يتصرف
فكر انه يطلقها، فكر يضربها افكار كتير متضاربة في دماغه لغاية ما قرر بالفعل انه
يطلقها
ليست هناك تعليقات:
إرسال تعليق