يوميات مدرس

الحكاية الثامنة

اياد: المديرة طلبتني النهاردة وطلبت مني أقول ان رغدة هي اللي جت واعترفت عليهم بعد لما حست بالندم ودا في تحقيق رسمي في المدرسة

يسر: طب ورغدة ح تقول كده ولا ح تخاف؟

اياد: مش عارف والله يا يسر بس دا اللي المديرة قالته

يسر: طب على بركة الله اعمل اللي قالت لك عليه وربنا يقدم اللي فيه الصالح

اياد: يا رب

وفعلا روحت المدرسة وقابلت المديرة قبل التحقيق

ابلة انتصار: زي ما قت لك يا اياد، اوعى تجيب سيرة إنك راقبتهم، رغدة هي اللي اعترفت لك

اياد: طيب هي فعلا ح تقول كده

ابلة انتصار: ما تقلقش سيبها عليا أنا دي، على فكرة أنا مش ح اتدخل في التحقيق

اياد: حاضر يا ابلة انتصار ربنا يقدم اللي فيه الصالح

حضرت اليوم عادي، لغاية لما جه الساعي وقالي ان ابلة انتصار طلبتني، وقفت رائدة الفصل تحفظ نظامه وروحت لأبلة انتصار

ابلة انتصار: أستاذ اياد، اعرف حضرتك باستاذة سناء هي المسئولة اللي الوزارة بعتتها تحقق في الشكوى ضدك، بخصوص علاقتك بالمدعوة هند فخري عبد النور

اياد: اهلا أستاذة سناء

سناء: اهلا أستاذ اياد، يا ريت نبدأ التحقيق

اياد: تحت امرك يا فندم

سناء: اسمك وسنك

اياد: اياد حسن العربي، 24 سنة

سناء: ما هو قولك فيما نسب اليك من إقامة علاقة مع الطالبة هند فخري عبد النور؟

اياد: انا سمعت الاشاعة اللي حصلت دي، بعدها جت الطالبة رغدة محمد عبد العال قالت لي، ان أستاذ جوهر واستاذة فريدة مدرس اول المادة هما اللي كلبوا منها دا، وانها اذا رفضت ح تخسر درجات اعمال السنة كلها. بعد انتشار الاشاعة حست بالذنب وجت اعترفت لي عشان اسامحها

سناء: طيب بعد كده ايه اللي حصل

اياد: جيت لاستاذة انتصار وحكيت لها اللي حصل كله

سناء: أستاذة انتصار الكلام دا مظبوط

انتصار: فعلا، أستاذ اياد جه وحكى الكلام اللي قاله لحضرتك

سناء: وبعدين حضرتك عملتي ايه؟

انتصار: استدعيت الطالبة رغدة وسألتها عن الموضوع وأكدت نفس كلام أستاذ اياد

سناء: لو سمحتي ممكن تستدعي الطالبة

انتصار: ممكن بس بلاش تقولي لها تحقيق عشان ما تخافش

سناء: مفهوم طبعا

وفعلا تم استدعاء رغدة

رغدة: ابلة انتصار حضرتك عايزاني؟

انتصار: ايوة يا رغدة، ابلة سناء عايزة تسألك على الموضوع اللي حكتيه ليا

رغدة: ايوة يا ابلة سناء

سناء: احكيلي يا رغدة أستاذ جوهر وابلة فريدة طلبوا منك ايه

رغدة: والله يا ابلة انا مظلومة

سناء: ما تخافيش يا حبيبتي محدش ح يقدر يعمل لك حاجة

رغدة: أستاذ جوهر وابلة فريدة قالوا لي أقول ان هند واستاذ اياد بيحبوا بعض بدليل انه دافع عنها عشان هي لقيطة، انا خفت ابلة فريدة قالت لي محدش ح يعرف و ح تاخدي درجات اعمال السنة كاملة

سناء: وبعدين عملتي ايه؟

رغدة: عملت زي ما قالوا وبعدين لما لقيت هند على بتعيط صعبت عليا وما عرفتش اعمل ايه حكيت لاستا        ذ اياد يتصرف

سناء: خلاص يا رغدة بس ما تقوليش لاي حد انك قولتي كده، ولو أستاذ جوهر او ابلة فريدة سألوكي قولي انك قولتي لنا ان أستاذ اياد بيحب هند، اتفقنا

رغدة لسه خايفة: اتفقنا

سناء: خلاص يا رغدة روحي على فصلك، ابلة انتصار لو سمحتى أستاذ جوهر وابلة فريدة يجوا حالا، مش عايزاهم يقابلوا رغدة نهائي

وفعلا تم استدعاءهم للتحقيق

وتم التحقيق معاهم وانتهى بقرار فصلهم من المدرسة بسبب سلوكهم المشين والحمد لله عدت على خير وربنا سترها

يوميات مدرس

بعتذر عن عدم النشر الاحد الماضي ودي حلقة النهاردة

الحكاية السابعة

أنا يسر روحت النهاردة زيارة لنورا صحبتي، طبعا فاكرينها.

نورا راحت المستشفى أخيرا عشان تتعالج، الفترة اللي فاتت كانت الزيارة ممنوعة عنها، ولما سمحوا بالزيارة استأذنت من اياد عشان اروح ازورها، رغم انها مش صحبتي قوي، يعني مش من المقربين، بس هي صعبانة عليا جدا، عشان كده قررت أفضل معاها وآخد ايدها لغاية طريق الشفا والبعد عن المخدرات.

-         عاملة ايه النهاردة؟

-         عادي، كويسة

-         مالك يا بنتي، الدكتور المشرف عليكي بيقول بقيتي احسن

-         بس وائل لسه ما جاش يزورني لغاية دلوقتي

-         انتي عارفة انه هو بالذات ممنوع يزورك

-         ليه يعني؟

-         عشان هو مدمن وحضرتك بتتعالجي من الإدمان

-         بس انا خفيت

-         لأ لسه

-         ليه بقى؟

-         انتي لسه في مرحلة النقاهة، يعني ما ينفعش أي رابط بالادمان حاليا او مستقبلا

-         يعني مش ح اشوف وائل

-         تعالي هنا، وائل وائل، مش هو دا اللي كنتي ح تموتي نفسك عشانه

-         اه، بس وحشني قوي

-         وحشك؟؟!!! بعد كل الكلام اللي قاله لك

-         بحبه يا يسر بحبه

-         ملعون أبو الحب اللي يبعزأ الكرامة

-         يعمل اللي يعمله، بحبه، ما اقدرش استغنى عنه

-         يعني ايه، يضربك مثلا وبرضه تحبيه

-         يااااااااااه دا ياما ضربني بس بحبه، عارفة هو اللي عرفني طريق الإدمان

-         دا انتي حكايتك حكاية، فهميني

-         هو الوحيد اللي كان مهتم بيا بسبب ظروف انفصال اهلي، ولما لاقاني قرفانة وزهقانة باستمرار عرفني على طريق المخدرات عشان ارتاح شوية

-         وارتحتي؟

-         في الأول بس، وهو كان كويس اكتر لما بدأت وحتى هو اللي كان بيجيب المخدرات

-         يا شيخة

-         اه والله

-         وبعدين

-         حب يبطل، بدأ يبقى عصبي يضربني ويشمتني

-         وانتي عملتي ايه

-         كنت بعيط وبعدين هو يجي يصالحني

-         وانتي رد فعلك ايه على دا كله

-         بنتصالح وبقوله اني بحبه وما اقدرش استغنى عنه ولو ح يبطل نبطل سوا ولو ح يستمر نكمل سوا

وهنا جه الممرض يقولي ان الزيارة انتهت، سيبتها على وعد بزيارة تانية وروحت البيت لاياد، وهو حالته النفسية مش قوي بسبب مشكلة هند في المدرسة. بس دا ما يمنعش احكي له عشان افهم

-         روحت النهاردة زيارة لنورا وتخيل اللي حصل.

وطبعا حكيت له كل حاجة من الالف للياء

-         اللي عند صحبتك دا مش حب

-         اومال ايه

-         دي حاجة اسمعها ادمان شخص

-         ادمان شخص؟؟!!!!!

-         ايوة، هي ادمنت اللي اسمه وائل دا، وهوا اللي وصلها لادمان المخدرات ياما اشخاص ادمانهم هو اللي وصل للادمان الحقيقي

-         مش فاهمة

-         يعني اللي اسمه وائل دا مهما عمل فيها هي ماسكة فيه، خايفة تبعد عنه، لكن دا مش حب، لأن الحب تفاهم واحترام وخوف على الطرف التاني، ودا مش متوفر في علاقتهم يعني يعمل اللي يعمله فيها هي راضية مش حب ولكن خوف تبعد عنه، وتنتهي علاقتها بيه، خصوصا انه كان اقرب حد ليها في ازمتها

-         والحل

-         زي ما الدكتور مقرر تبعد عنه وتتمنع من زيارته لغاية لما تخف منه هو كمان

-         اتنورت المحكمة انت بقى عملت ايه في مشكلتك النهاردة

يوميات مدرس

الحكاية السادسة

أنا بقالي في المدرسة دلوقتي تقريبا سنة كاملة، وبالظبط من ساعة موضوع هند تيرم دراسي، طبعا أنتم لسه فاكرين هند، البنت اليتيمة اللي مش كفاية عليها قسوة الأيام كمان احنا جايين نزود عليها الهموم.

حال هند بقى أفضل خصوصا إني لقيت بنات بقت تقعد معاها وتتكلم، وبعد تيرم كامل أخيرا شفت ضحكة هند، البنات مش ملايكة هنا بس كلهم خافوا أزعل منهم لو حد زعل هند. كلهم مجتهدين في المواد بتاعتي لكن هند مجتهدة في كل المواد، بصراحة أتنبأ لها بمستقبل باهر لو الناس سابيتها في حالها.

المشكلة بقى بعد الموضوع دا وكلامي فترات طويلة مع هند ومع البنات عنها وعن ظروفها وسلوك الرسول عليه الصلاة والسلام مع من في مثل حالتها، البنات اتجننت وافتكروا اني بحب هند، أه والله والعظيم، مش عايز اقولكم انا سمعت الاشاعة دي من كام واحد وواحدة في المدرسة، حتى أولياء الأمور قدموا شكوى رسمية ليا لأني بأحرض البنات على الحب.

اول من كلمني في الموضوع دا كانت أبلة علياء انتم عارفين طبعا إنها من سني بس الحمد لله متجوزة، عشان كده اهتميت بكلامها وخصوصا كمان إنها بتدرس مواد تانية خالص غير المواد بتاعتي

علياء: السلام عليكم ورحمة الله وبركاته

اياد: وعليكم السلام ورحمة الله وبركاته

علياء: أستاذ اياد ايه الكلام اللي ملا المدرسة دا

اياد: كلام ايه مش فاهم

علياء: عنك انت وهند

اياد: مالي ومال هند، كانت مشكلة وح تأثر على البنت وعلى مناخ التدريس في الفصل والمديرة اقتنعت بكلامي، بدليل كلنا اتكلمنا على الرأفة بحال اليتيم وسلوك الرسول مع الأيتام وخصوصا اللي في ظروف هند، ايه بقى المشكلة

علياء: مش دي المشكلة، المشكلة حضرتك ان فيه اشاعات انكم بتحبوا بعض

اياد (بكل تعبيرات البلاهة وعدم الفهم): نعم!!!!!!!!!!!!!!!!

علياء: انت ما سمعتش الكلام دا ولا ايه، دا كل المدرسين عندهم خبر بيه

اياد (لسه مش فاهم والتعبيرات إياها على وشه): كل المدرسين عارفين، يا ما شاء الله طب مش حد يعرفني يا جماعة اني بحب البنت عشان أتقدم لها رسمي. مين اللي طلع الاشاعة دي نفسي افهم؟

علياء: الموضوع مهم ومش مجرد إشاعة، احتمال يتفتح فيه تحقيق، وعشان ابلة انتصار مش مصدقة طلبت مني اجي أتكلم معاك.

اياد: طيب مين بلغها من المدرسين بشكل شكوى مني اكيد ليه يد

علياء: ابعد عن المدرسين ركز على البنات لو عرفت مين من فصلك أو مجموعتك هي اللي نشرت الكلام الموضوع ح يتقفل

اياد: شكرا ابلة علياء، مش عارف ارد جميلك دا ازاي

وطبعا كالعادة استنيت أوصل البيت لمستشاري في الأمور المستعجلة يسر حبيبتي الغالية، وبعد الغدا وغسيل المواعين وعمايل الشاي فتحت الموضوع مع يسر وسألتها اعمل ايه واعرف البنت او البنات دول ازي

اياد: شفتي الهنا اللي انا فيه

يسر: انت في مصيبة لو ما اتحلتش

اياد: اعمل ايه طيب

يسر: اخبار أستاذ جوهر ايه

اياد: انا باتكلم في ايه وانتي في ايه

يسر: يا ابني انا بحل معاك الموضوع، انت عملت اسم مع البنات، ولما بدأت تدي مجموعات التير مدا البنات ملت الفصول بتاعتك، وطبعا دا اثر عليه هو والاستاذة التانية دي اسمها ايه

اياد: اسمها فريدة

يسر: راقب الاتنين دول الأيام الجاية وشوف مين اكتر حد بيقف معاهم من البنات وحاول توريهم انك شفتهم، لو اتلخبط ودي حركة لا ارادية لو عامل حاجة غلط وحس انه اتكشف ح تبقى عرفت البنت واللي حرضها، اما ابلة فريدة فهي العقل المدبر واللي اتفقت مع البنت وفي الغالب هددتها بأعمال السنة وفي نفس الوقت عشمتها لو تم الموضوع والاشاعة اتنشرت ح تاخد درجات اعمال السنة كاملة

اياد: يا بنت الذين، دماغ سم

يسر: لا دماغ ستات

فعلا سمعت كلام يسر وراقبت جوهر وفريدة والبنات اللي بتقف معاهم من بعيد لبعيد لغاية لما لقيت رغدة هي العامل المشترك، فقررت انفذ الجزء التاني بأني اخليهم يشوفوني وانا شايفهم مع بعض ايه اللي ح يحصل. وفلا طلع كلام يسر حقيقي والكل ارتبك البنت وفريد وجوهر، بعد كده عملت نفسي مش فاهم حاجة عشان يطمنوا وروحت لابلة انتصار

اياد: السلام عليكم ورحمة الله وبركاته

انتصار: وعليكم السلام ورحمة الله وبركاته، ازيك النهاردة يا اياد خير

اياد: انا عرفت مين اللي ورا الاشاعة اللي طلعت

انتصار: انت متأكد

اياد: آه أنا راقبت البنات كلها والمدرسين كمان لغاية لما وصلت لمصدر الاشاعة

انتصار: راقبت البنات والمدرسين كمان

اياد: دي مصيبة لو الكلام ثبت انه صح كان لازم اتصرف

انتصار: ووصلت لايه

اياد: مصدر الاشاعة بنت عندي اسمها رغدة في نفس فصل هند، وهي على فكرة سبب مشكلة هند الأولى ومعايرتها بإنها لقيطة، معاها بقى أستاذ جوهر وابلة فريدة وانا مش عارفة اعمل ايه

انتصار: الكلام دا أكيد بنسبة اد ايه

اياد: 100% مش ح اتهم حد ظلم

انتصار: طيب ما تعملش أي حاجة وسيبني انا اتصرف واجيب لك حقك ولا كأنك قلت لي حاجة

اياد: حاضر

وسمعت الكلام واتعاملت ولا كأن حاجة حصلت، بس الغريب ان الاشاعة كل يوم بتزيد ولقيت أستاذ جوهر وابلة فريدة بيقولوا لي اني كده جايز اترفد من المدرسة لسوء سلوكي مع الطالبات وانهم مش ح يسكتوا على الموضوع، عملت من بنها بس وأنا أعصابي بتغلي وجريت على ابلة انتصار

انتصار: اهدا كده كلامهم دا في مصلحتك على فكرة وبيأكد كلامك سيبهم ولا كأن في حاجة أنا برتب لهم مصيدة عشان الجزا يبقى رادع ليهم ولأمثالهم، احنا في مدرسة مش كباريه

اياد: مش فارقة معايا جزا وعقاب فارق معايا سمعتي

انتصار: ما هو عشان سمعتك يا اياد انا بعمل كده، اصبر يا ابني ان الله مع الصابرين

يوميات مدرس

الحكاية الخامسة

انا يسر طبعا عارفيني، انا اللي ح أتكلم معاكم النهاردة، فاكرين طبعا نورا زميلتي في الكلية، أنا رايحة لها النهاردة وح احكي لكم اللي حصل

مستشفى الطلبة

-         ازيك يا نورا عاملة ايه النهاردة

-         الحمد لله يا يسر وانتي اخبارك ايه

-         تمام، عايزة اطمن عليكي وفين ماما

-         انا كويسة، ح اتحول لمستشفى تاني عشان علاج الإدمان وعلاج الاكتئاب، أما ماما فراحت الشغل، هي شايفة اني أهيف من إنها تقضي معايا شوية وقت، وافقت على المستشفى اللي ح أدخلها عشان ما يتعملش محضر إهمال ليها، خايفة إن بابا يعرف ويطالب إني أقعد معاه

-         وانتي احسن لك تقعدي مع مين فيهم

-         الاتنين مش فاضيين لي يا يسر، ماما الشغل هو كل حياتها خصوصا بعد طلاقها أما بابا فمهتم بمراته الجديدة والبيبي الصغير أخويا اللي لغاية دلوقتي ما أعرفش اسمه ايه

-         انتي بتتكلمي جد؟

-         اه والله، عرفت من بابا ان مراته ح تولد من شهر، وما اتصلش من بعدها وماما قالت لي انه خلف ولد

-         طب وانتي ليه ما حاولتيش تكلميه؟

-         اكلمه ليه، اذا كنت غلطة هما الاتنين مش عايزينها ورافضينها

-         طيب ما لكيش قرايب تقعدي معاهم تكلميهم

-         قرايب! دا أنا عرفت عمي صدفة، أهلي عمرهم ما اهتموا بقرايبهم والنتيجة أعمامي وخالاتي ما أعرفش حد منهم، ولا هما يعرفوني، وطلاق والدي ووالدتي كمل على رحلة عدم المعرفة

-         وانتي يا نورا ليه أدمنتي؟

-         عشان أهرب من واقع أنا رافضاه، ومش عايزاه، وعلى فكرة أنا اتجهت للادمان لما عرفت اني ممكن اموت أوفر دوز بس للأسف دا ما حصلش

-         طيب وناوية على ايه؟

-         مش عارفة، حتى وائل ما سألش عليا لغاية دلوقتي

-         مين وائل دا؟

-         دا الوحيد اللي اهتم بيا، زميلنا في آداب انجليزي في آخر سنة، هو كمان مدمن زيي

-         هو اللي عرفك على الإدمان؟

-         ايوة

-         خسارة يا نورا، دا كده مش مهتم بيكي، دا كده بيموتك

-         صدقيني يا يسر مش فارقة، مين قالك إني عايزة أعيش أصلا، أعيش ليه ولمين؟ محدش عايزني الكل بيعتبرني غلطة، حتى الشخص الوحيد اللي حبيته واهتم بيا، أول ما بدأ يتعالج بعد عني وسابني في وسط الطريق

-         هو وائل بيتعالج من الإدمان؟

-         ايوة يا ستي وشايف إني مريضة وهو ما ينفعش يرتبط بانسانة مريضة زيي

-         وانتي ناوية تعملي ايه يا نورا

-         صدقيني مش عارفة، بس قررت أموت، أو بمعنى أدق، ح استسلم للواقع خفيت ماشي فضلت في المستشفى عادي

-         للدرجة دي يائسة من كل حاجة؟

-         اديني سبب واحد أعيش ليه وأحب الحياة

-         انتي يا نورا، عيشي عشانك، انتي لسه صغيرة

-         أعيش ليه، وأنا أصلا كارهه نفسني

-         انتي بتصلي يا نورا؟

-         لا

-         ليه؟

-         اقابل ربنا ازاي وأنا ليا صاحب ومش محجبة وبشرب بيرة وساعات حاجات تانية

-         ليه كده يا نورا، انتي لسه صغيرة على كل دا

-         تعبانة وقرفانة وبكره كل حاجة حتى أنا

-         طب ممكن تجربي تصلي وتقري قران وانتي في المستشفى ممكن تقدري تعيشي حياتك

-         حاضر

-         استأذنك بقى يا نورا عشان ألحق إياد

-         اتفضلي

كان كلامي مع نورا صدمة، عمري ما تخليت حد يكون عايش كده وبعيد عن ربنا، أنا كمان تعبت لما بابا اتوفى وعيشت من غير أم، لولا طنط علية ما كنتش عرفت يعني ايه حنية أم. إياد حبيبي كل دنيتي، عمري ما تخيلت إن حد فينا ممكن يضعف ولا هو البعد عن ربنا مش عارفة.

منزل اياد

اياد: حمد لله على السلامة

يسر: حبيبي، اسفة بس الطريق كان وحش

اياد: طب ياله ناكل بقى أنا واقع من الجوع

يسر: عيوني، تصدق مش عارفة اصدق الكلام اللي سمعته من نورا النهاردة

اياد: احكي

حكيت له كل اللي حصل بينا وقلت له على استغرابي

اياد: واضح انهم كلهم بعيد عن ربنا، البنت نتيجة تربية واسرة وواضح ان كلهم عندهم اهتمامات تانية وكل واحد فيهم بيفكر في نفسه، حتى الاب لما طلق كأنه طلق بنته هي كمان والأم اتجوزت الشغل وطلقت بنتها، مسكينة نورا بس هي كمان أنانية بتعاقبهم وهي بتعاقب نفسها ادعيلها ربنا يشفيها