يوميات مدرس

الحكاية التاسعة عشر

عرفتوا ان عبير حامل والبهدلة اللي اتبهدلنا فيها عشان تكشف في التأمين الصحي، وقررنا ان مفيش حاجة اسمها تأمين صحي بعد كده، ودورنا على دكتور خاص نتابع عنده الحمل لغاية ميعاد الولادة.

الدكتور كتب لها على مجموعة ادوية عشان الحمل والفيتامينات المطلوبة ومثبت حمل، مش عايز اقولكم على أسعار الادوية عاملة ازاي أسعار عالية جدا ويا ريت الدواء موجود، كمان ناقص من السوق ومش موجود في معظم الصيدليات، ولما سألت عرفت ان المشكلة مش في ادوية الحمل بس لقيتها في ادوية كتير ومنها حاجات زي الانسولين وادوية السرطان وغيرها.

طيب اللي مش معاه فلوس يشتري دا يعمل ايه، طيب وانا اعمل ايه عشان أكمل فلوس الادوية اللي عبير محتاجة تاخدها، اضطريت ازود عدد الدروس الخصوصية بس دي ح تغطي ايه ولا ايه، تغطي أسعار الادوية ولا أسعار الاكل والشرب ولا باقي الحاجات اللي زاد سعرها اضعاف.

انا وعبير على الغدا عند حمايا

والد عبير: الف مبروك الحمل يا اياد أخيرا ح تبقى اب وخليني جد

اياد: والله يا عمي ما كنتش مقصودة انا متضايق على تعب عبير، حملها صعب وهي عندها محاضرات ورسالة

عبير: مالكش دعوة بتعبي على قلبي زي العسل أخيرا ح ابقى ام ويبقى ليا طفل مني ومنك

والدة عبير: الف مبروك يا بنتي ربنا ييسر لك ساعة سهلة، سألتي على الدكتور اللي بتابعي عنده كويس

عبير: سألت زميلاتي في الكلية بيقولوا عليه ممتاز وربنا ييسر الأمور كشفه نار

والدة عبير: اشمعنى هو ما يغليش ما كل حاجة بقت غالية نار، والله يا بنتي الميت جنيه كأنها عشرة جنيه ولا ليها أي قيمة اخرها حتة جبنة و لبن وعيش ومش ح اقولك على الزيت والسكر وباقي الحاجات

اياد: فعلا الحاجة كلها سعرها زاد اكتر من الضعف، ناس تقول الدولار غلي وناس تقول مفيش سلع أصلا وناس تانية تقول استغلال بس في الاخر الأسعار غير مبررة حتى موضوع المقاطعة ولا ليه لازمة

عبير: الناس أصلا مش عندها ثقافة المقاطعة، وكمان ح نقاطع ايه ولا ايه، المقاطعة دي بتكون لسلعة واحدة او اتنين، دلوقتي في الأسعار دي ح تقاطع ايه دا حتى الفول والطعمية اسعارهم زادت

والد عبير: رأيي ان الحل ان كل واحد يستغنى عن اللي يقدر عليه ويتشتري احتياجاته الضرورية والاهم يدور على شغل تاني لأن في الغالب المرتب مش ح يقضي اول عشر أيام في الشهر

خلصنا الغدا والقعدة الحلوة مع حمايا وحماتي، وطبعا عبير اخدت الوصايا العشر عشان الحمل وصحتها اللي مش عاجباني نهائي ربنا يقومها بالسلامة ويطمني عليها.