يوميات مدرس

الحكاية الثامنة عشر

عبير بقالها شهر ونص دلوقتي تعبانة ومش عارفين مالها، معندهاش أي شهية للاكل وفقدت حوالي 2 كيلو من وزنها، على طول تعبانة ومجهده.

المهم وبعد زن مني اقنعتها إننا لازم نكشف لأن اللي هي فيه دا مش طبيعي كل شوية كانت بتقولي اجهاد شغل أو إنها اضطرت تاكل من بره فتقريبا الاكل مش كويس كان مفيش اكل بيستنى في معدتها اكتر من 10 دقايق، الوضع دا قلقني جدا، اضطريت اكلم باباها عشان نقنعها بالكشف، أخيرا وافقت بس على شرط نكشف في التأمين الصحي اللي هي تابعة ليه، وبما اننا ما صدقنا إنها وافقت وافقنا على شرط التأمين الصحي ويا ريتني ما وافقت.

روحنا العيادة نكشف باطنة وطبعا دور عشان اسجل اسمها في المرضى ودور تاني اسجلها على الكمبيوتر ودور ثالث عشان ندخل للدكتور، وتبدأ الطوابير.

بهدلة ما بعدها بهدلة وطريقة معاملة من الموظفين للمرضى وكأننا بنشحت منهم مش بنتعالج من فلوس احنا أصلا بندفعها كل شهر عشان اما نتعب نلاقي العلاج. والسؤال هنا انا افضل في عراك وطوابير عشان ادخل للدكتور ليه، وليه اخوض 3 معارك عشان ادخل اكشف ليه مش مرة واحدة الاسم يتسجل على الكمبيوتر والملف يتحول على الدكتور على طول، ليه البهدلة للناس المفروض انها تعبانة والله كان فيه حالات تصعب على الكافر والموظف بيزعق له عشان لازم يطلع الدور الثالث على السلم يجيب الملف من الأرشيف وهو قعيد ومفيش اساسنسير والموظف بيزعق له انه مالوش دعوة يطلع يزحف بقى يدور له حد. الراجل صعب عليا وكنت كده كده طالع عشان عبير اخدت الكارنيه بتاعه وطلعت الأرشيف ليا وليه.

كل طابور من دول في دور تحس كده انهم بيعذبوا المرضى مش بيعالجوهم، بيعاقبوهم عشان عيانين، وفي الاخر الاقيهم قال ايه بيتكلموا عن التطوير اللي حصل في التأمين الصحي.

كنت بسأل نفسي ليه اروح الأرشيف وبعدين اروح اسجل ورقي وبعدين اسجل على الكمبيوتر ليه ما اروحش مرة واحدة بالكارنيه على التسجيل على الكمبيوتر وبعدين هما يجيبوا الملف ويسجلوه ويبعتوه على العيادة.

طبعا دي كانت الدورة الأولى من المأساة، الدورة الثانية بدأت لما الدكتور طلب تحاليل لعبير ولقيت نفسي بلف تاني عشان اخد تحويل للمعمل اللي هو في نفس المكان عشان هي تعمل التحليل، وبعد ما اللفة خلصت وعملت التحاليل طلبوا مننا نيجي بكرة عشان تحليل السكر الصايم والفاطر واكتشفت اني لازم الف تاني عشان تحليل السكر مسكت اعصابي بالعافية عشان ما اعملش مشكلة وعملنا التحاليل الحمد لله كلها ولفيت عشان اعرض التحاليل على الدكتور اللي قالنا في النهاية بعد أسبوع من اللف في التأمين الصحي مبروك المدام حامل.

يوميات مدرس

الحكاية السابعة عشر

بقالي أنا وعبير متجوزين أربع سنين دلوقتي وهي خلصت كليتها واتعينت معيدة فيها، مبسوط جدا للمركز اللي وصلت ليه، لسه معندناش أولاد زي ما اتفقت مع والدها مفيش أولاد لغاية لما تخلص كليتها واتفقنا زي ما هو.

فيه بقى شوية ناس كده مش عارف أقول عليهم ايه، لازم يدخلوا في كل حاجة وسؤال هو مفيش حاجة في السكة ولا ايه مش بيبطل، الاغرب بقى بما اني راجل فالمدرسات اللي لسه ما اتجوزتش كل واحدة بترغي ازاي كل عيلتها البنات خلفوا في اول الجواز والسعادة والهنا اللي هما عايشين فيها

طبعا انا مش باتكلم عن خصوصيات حياتي مع حد أيا كان، باستثناء عبير مراتي طبعا واختي يسر

الغريب اني لقيت يسر وجعفر بيعانوا من نفس المشكلة، عرفت الموضوع دا لما كان جعفر ويسر عندنا كانوا نازلين أسبوع إجازة عشان يسر تعرض شغل رسالتها على المشرفة على الرسالة

اياد بفرحة: ازيكم ايه المفاجأة الحلوة دي

يسر وهي ترتمي في أحضان اخيها: الحمد لله وحشتوني جدا والله

جعفر بتهريج: ايه يا ستي انا بغير على فكرة

اياد بنفس التهريج: غير براحتك اختي وح احضنها تاني وان كان عاجبك

جعفر تكمتا للتهريج: طب امشي انا بقى

عبير: خلاص يا عم اياد ارحم الراجل شوية دا جاي زيارة وماشي خف عنه

يسر: اعمل ايه انتم وحشتوني جدا

اتغدينا سوا وبعد الغدا وشرب الشاي وحكاوي يسر عن الرسالة والحياة في لندن والشمس اللي نفسها تشوفها من كتر ما هي مش بتشوفها قعدنا نرغي ووصل الكلام على تدخل الناس في شئون بعضها بدون وجه حق

اياد: تخيلوا ان سؤال مفيش حاجة جاية في السكة بقى السؤال المقرر لاي حد اقابله راجل او ست بجد كرهت السؤال دا والتدخل في الشئون الخاصة لدرجة انك تلاقي عروض أسماء عيادات ودكاترة ومستشفيات

جعفر: عادي نفس المشكلة بقابلها من بعض الناس دا غير عروض الزواج باغراء ان عيلة الهانم بيخلفوا بسرعة

اياد: واضح انها مشكلة عامة

عبير: المشكلة أغبى لما تبقى ست تلاقي بقى الستات بتدخل وتدي نصايح وانت ما اتكلمتش أصلا حاجة مقرفة بس انا بأرد اقفل أي فرصة للكلام زي دي مسألة خاصة وأنا مش بناقش الموضوعات الشخصية مع أي حد

يسر: والجواب دا يفرق معاكي

عبير: بصراحة مش كتير بس الناس بقت تتكلم بحذر اكتر خوفا من الكسوف والرد الجاف

اياد: مش عارف ليه الناس بتدخل في أمور غيرها ما كل واحد يخليه في حاله

جعفر: التدخل دا بقى ظاهرة كبيرة ومحتاجة دراسة بس غالبا داب يبقى هرب من المشاكل الشخصية لمشاكل وموضوعات ناس تانية

وغيرنا الكلام وخلص اليوم على كده

يوميات مدرس

الحكاية السادسة عشر

النهاردة حصلت مشكلة بين جعفر ويسر وبصراحة مش عارف تتحل ازاي، الاتنين جاتلهم منحة للسفر، جعفر جات له منحة للدكتوراة في بريطانيا ويسر جات لها منحة الماجستير في فرنسا، بصراحة الاتنين فرصة بس ازاي كل واحد فيهم ح يعيش في بلد غير التاني. أنا أصلا مش مقتنع إن حد يسافر ويسيب التاني في بلده، ما حال ان كل واحد في بلد غريبة مشكلة ومش عارف تتحل ازاي؟

حكيت لعبير على المشكلة اللي بين جعفر ويسر لعل يكون عندها حل للمشكلة دي وطلبت مني وقت تفكر بعد ما سألتني على إمكانيات جعفر المادية أخبارها ايه وطبعا عرفتها انه مستريح قوي ما هو دكتور والكشف بتاعه بشيء وشويات مع شوية قر وحسد كده عشان فرق الدخل بين المدرس والدكتور طبعا من باب الهزار مع مراتي مش قر وحسد بجد.

وجه الوقت الموعود وشرف جعفر ويسر بيتنا المتواضع وهما الاتنين محتارين ازاي يحلوا المشكلة دي ومين اللي لازم يضحي عشان التاني وفرضا لو جعفر قبل المنحة ويسر رفضتها لازم تفضل هنا في مصر عشان تكمل ولو يسر قبلت وجعفر رفض لازم جعفر يفضل هنا عشان رسالته، حاجة تحير وكلنا محتارين وعبير اتكلمت عشان نفكر جماعي بدل ما كل واحد مش عارف يلاقي حل لوحده

عبير: بصوا بقى الاكل لسه سخن ناكل الأول وبعدين الحل سهل بأمر الله

يسر: سهل ازاي دا احنا دماغنا ورمت من كتر التفكير في الموضوع دا

عبير: صدقيني سهلة بأمر الله ناكل الأول وبعد كده نرغي ونفكر لحد الصبح ياله بينا

جعفر: يا ريت والله يكون عندك حل للمشكلة دي، احنا حتى فكرنا لو حد فينا اتنازل عن المنحة لاقيناه ح يضطر يقعد هنا يكمل حاجة تتعب العقل

عبير: قلت لكم ناكل الأول والحل سهل وموجود بأمر الله

اياد: أموت وأعرف بتفكري في ايه

عبير: ح تعرف بعد ما تعمل الشاي بعد الغدا

وفعلا اتغدينا كلنا وكل ما حد يجيب سيرة الموضوع دا على الاكل عبير ترد نفس ردها، لدرجة كلنا نفسنا نعرف هي بتفكر في ايه، وعملت الشاي زي ما قراقوش حكمت وقعدنا نتكلم في الموضوع

عبير: د. جعفر امكانياتك المادية ظروفها ايه

جعفر: مش فاهم؟

عبير: يعني لو ضحت يسر بالمنحة وسافرت معاك هل عندك الإمكانيات انها تذاكر وتسافر مرة كل شهر او أسبوعين حسب ظروف رسالتها هنا؟ ولو انت اتنازلت عن المنحة هل عندك إمكانيات انك تدرس على حسابك في فرنسا مع يسر؟

جعفر: المشكلة ان البعثة للندن موفرة كل حاجة الإقامة لينا أنا ويسر والجامعة والمستشفى عشان الحالات العملية، من الناحية المادية والعملية لندن افضل

عبير: طيب عندك الإمكانيات ان يسر تسافر وتدرس عندك على حسابك، بما انها صعب تغير المنحة من بلد لبلد تاني؟

جعفر: اه الحمد لله

وهنا اتدخلت أنا بهزار: طبعا ما انت الكشف باد كده لازم يبقى معاك على قلبك شيء وشويات

جعفر: يا ساتر يا رب عليك يا أخي مش قادر تنسى القر شوية حتى دلوقتي

عبير: ما سمعتش صوتك يا يسر خالص

يسر: فكرتك حلوة يا عبير ازاي ما فكرتش فيها أنا ممكن اتنازل عن المنحة على شرط جعفر يوفر لي الكتب والسفر بصفة دورية لمتابعة الماجستير وهما في الجامعة برضه ح يقدروا موضوع السفر فمش ح يكون السفر كل أسبوع زي ميعادي مع المشرفة على الرسالة ممكن يبقى كل شهر او 3 أسابيع

عبير: ايه رايك يا دكتور جعفر

جعفر: فكرتك رائعة يا عبير ازاي محدش فينا فكر فيها قبل كده

اياد: عشان كلنا كنا بنفكر جوا الصندوق مش برة الصندوق زي ما عبير عملت، شغل سياسة واقتصاد بقى

عبير: الفكرة كلها ان لما حد يتنازل يلاقي مقابل التنازل دا، ودي الطريقة اللي فكرت بيها بس ما كنتش عارفة إمكانيات دكتور جعفر ايه عشان كده خليت الكلام بعد الغدا عشان لو ما وصلناش لحل نفكر تاني وعاشر

يسر: تسلمي لي يا مرات أخويا، دماغك تتوزن بالدهب، الحل بتاعك رائع وأنا أهم حاجة عندي إننا أنا وجعفر نكون مع بعض دايما وانتي وفرتي الحل دا بسهولة

والحمد لله اتحلت مشكلة يس وجعفر، ح يوحشوني لما يسافروا خمس سنين مش قليل

يوميات مدرس

الحكاية الخامسة عشر

ازيكم النهاردة أنا اياد طبعا عايزين تعرفوا ايه اللي حصل في موضوع عبير، زي ما قلت لكم استنيت لغاية لما السنة خلصت والنتيجة طلعت وعبير الأولى على المدرسة والإدارة التعليمية واتفقت مع عمي عشان نروح نطلبها من والدها، أنا مش بعرف نظام أكلمها هي الأول بحب أدخل البيت من بابه، عشان كده اتفقت مع عمي بعد النتيجة بأسبوع عشان نروح لهم واتصلت بتليفون المنزل اللي هو عادي اوصله من ملفها عندنا.

روحنا والترحيب كان كبير بينا واحنا هناك

والد عبير: نورتونا وأنستونا

عمي: البيت منور بأصحابه، بص يا حج احنا ح ندخل في الموضوع على طول، اياد ابن أخويا معجب ببنت حضرتك وعايز يتقدم لها رأيك ايه

والد عبير: الصراحة طلبكم جه مفاجئ والبنت لسه مخلصة ثانوية عامة وداخلة على جامعة

عمي: هي ح تكمل دراستها براحتها ولو حابة تشتغل بعد الدراسة دي حاجة ترجع لها هي

والد عبير: ما سمعنش صوت العريس يعني

اياد: أنا آسف يا عمي بس احنا اتعودنا لما الكبار يتكلموا الصغار يسكتوا لغاية لما يتوجه لهم كلام، وزي ما عمي قال لحضرتك هي ح تكمل دراستها وهي في بيتي وأوعد حضرتك ح تفضل على تفوقها مش ح تقل

والد عبير: وأنا ايه يضمن لي دا

اياد: أنا أختي اتجوزت وهي في الجامعة وخلصت ودلوقتي بتحضر دراسات عليا، احنا بنحب ندخل البيت من بابه عشان كده أنا جيت لحضرتك، وعشان أنا خايف على مستقبلها ما رضيتش أتقدم لها في الثانوية العامة واستنيت لما خلصت ونتيجتها ظهرت كمان

والد عبير: بصراحة يا حج انتم فعلا فاجئتوني بطلبكم والبنت لسه بتحتفل بنجاحها في الثانوية العامة، عموما اديني وقت اسأل عليكم واستخير ربنا وآخد رأي البنت

عمي: زي ما تشوف يا حج، في انتظار ردك ودا تليفوني ودا تليفون اياد لما تقرر حضرتك قرر تحب تكلم مين وفي انتظار ردك

والد عبير: انتم عيلة تشرف كفاية التربية اللي شفتها النهاردة أنا ح أكلمك وربنا يقدم اللي فيه الخير

عمي: خلاص انت عارف ابني شغال فين ومكان السكن اسأل علينا براحتك وعرفت مكان شغلي وسكني وربنا يقدم اللي فيه الخير

منتظر رد والد عبير بفارغ الصبر، أنا حبيت ادخل البيت من بابه وربنا يسهل ويوافق وفعلا بعد أسبوعين والدها اتصل بعمي وحدد ميعاد عشان نشوف بعض وطلب يشوف اختي وزوجها قبل ما يقول الرد النهائي، قال ان موافقته مبدئية وبعد المقابلة لو عبير وافقت ليه شروط وبالفعل روحنا الميعاد وكان أهل البيت كلهم موجودين على عكس المرة اللي فاتت، وكنت خايف انهم يسبونا لوحدنا أنا وعبير لأن ده معناه إنهم غير أمناء على بنتهم بس الحمد لله والدها فضل قاعد معايا أنا وهي واحنا بنتكلم وكان مشارك فعال محستش بالوقت خالص واحنا بنتكلم لغاية لما لقيت وعمي وجعفر بيقولوا يلا تقلنا على الناس كفاية كده.

وبعد أسبوع رد والدها بموافقة العروسة وان فيه قبول والحمد لله، وكان شرطه عشان نكمل الزواج فعلا اننا نأجل موضوع الأطفال لغاية لما عبير تخلص جامعة وقد كان واتفقنا على كده وعبير دخلت كلية سياسة واقتصاد وهي حرم الأستاذ اياد وكان دا أفضل قرار أخدته في حياتي إني اتجوز عبير عشق عمري.

عبير دلوقتي في سنة تانية في الكلية وتاني سنة تجيب امتياز مش ح ارضى ابدا ان مستواها الدراسي يقل عما كانت عليه قبل كده وعقبال ما تخلص السنة النهائية وتتعين معيدة في الجامعة.

يوميات مدرس

الحكاية الرابعة عشرة

في بداية الحلقة أحب أشكر دكتور جعفر محمد على مشاركته في الحلقة دي بمعلومات عن الطبيب النفسي

جعفر راجع النهاردة تعبان على الاخر وشكله متضايق جدا مش عارفة ليه، هو غالبا بيرجع كده لما يكون عنده حالة صعبة في المستشفى. ح نتغدى وبعد الغدا اعرف ماله، أنا يسر، طبعا أكيد عارفين من بداية الكلام، عن اذنكم أحضر الغدا.

-         مالك يا جعفر مش ميسوط ليه؟

-         ابدا النهاردة في المستشفى جالي مريض ادمان بس تحت الحراسة المشددة لأنه اتمسك معاه مخدرات، أهله حالتهم تصعب عليكي، من حرقة قلبهم على ابنهم اللي أصبح مريض ومجرم في نفس الوقت

-         هي المخدرات جريمة؟

-         طبعا جريمة ، بس بتختلف من حيازة مخدرات بهدف التعاطي وما بين حيازة مخدرات للاتجار فيها، الولد دا جالي قبل كده يتعالج بس للأسف رجع تاني والمرة دي اتمسك تعاطي، يعني من المستشفى على السجن

-         طيب ازاي جه مستشفى خاص وهو مقبوض عليه

-         اهله طلبه نقله للمستشفى عندنا وليهم واسطة كبيرة جابت الولد

-         ربنا يصبر اهله

-         يا رب

-         اللي مضايقني فعلا ازاي المخدرات منتشرة كده رغم التوعية عنها، كلهم شباب زي الورد

-         وايه اكتر حاجة بتدفعهم للادمان؟

-         الولد ده اهله منفصلين وفيه بينهم مشاكل كتيرة وهو بيهرب للادمان رغم اني حذرته المرة اللي فاتت وهو بيتعالج ما يصاحبش مدمنين تاني، بس للأسف رجع بشدة للمخدرات اكتر من الأول

-         والمشكلة ان أهله مش فاهمين انهم سبب مباشر في اللي حصله، مش عارف ألوم مين الولد اللي رحع للمخدرات ولا الأب والأم اللي مش فاضيين غير للمشاكل اللي بينهم ونسيوا ان فيه بينهم أولاد، الجديد بقى انهم المرة دي سألوني أنا خريج ايه      ؟ّ!!!

-         ازاي يعني؟

-         آه والله سألوني أنا خريج ايه، على أساس إني مش خريج طب

-         هو فيه دكتور نفسي مش خريج طب

-         فيه المعالج النفسي ودا بيكون خريج كلية نظرية مهتمة بعلوم النفس ووظيفته الأساسية العلاج النفسي زى الدكتور وممكن يكون اشطر من الدكتور كمان عادى جدا بس مينفعش يكتب دوا او يوصفه باى حال من الأحوال اما الطبيب النفسي خريج كلية طب وفضل في كلية الطب سبع سنين منهم سنة امتياز، ولما عرفوا اني طبيب سألوني ايه غير مشاكلهم اللي قلتها قبل كده ممكن يكون سبب في ادمان الولد ومين أصحابه على أساس اني لازم اعرف الغيب وانجم وافسر كل الاحداث

-         دول كده عايزين حد بيقرا الودع، لما هما أهله مش عارفين انت اللي المفروض تعرف، حاجة غريبة والله

-         لا دول سألوني على الجهاز اللي بحلل بيه الشخصيات

-         بتهرج اكيد

-         أه والله خلوني رديت عليهم بتريقة زيهم ان الدكتور النفسي مش ماشي بجهاز تحاليل وطالع نازل يحلل في الناس نسيو ان عندي مرارة وسهل جدا انها تتفقع عادى يعنى، زى اى انسان عنده خلق وطاقة تحمل ومش دوره انه يتحمل الناس بشكل مطلق المشكلة اني لازم أعالج العيان وأهله عشان مصلحة العيان نفسه

-         استني اما ارد على التليفون

o      السلام عليكم ورحمة الله وبركاته

o      ايوة أنا دكتور جعفر مين معايا

o      اهلا يا فندم ازي حضرتك

o      لا والله أنا في البيت، تقدر حضرتك تتصل بالمستشفى والدكتور النبطشي ح يطمن حضرتك على ابنك

o      يا فندم انا دكتور اه بس كمان بني بيحتاج ينام وياكل ويشرب ويعمل زى الناس كمان، يعنى عادى جدا انك ممكن اوقات متلاقيهوش

o      وعليكم السلام ورحمة الله وبركاته

-         مين يا جعفر

-         ابدا اهل مريض كانوا عايزين يعرفوا لو ابنهم عايز حاجة ويطمنوا عليه

-         طب ما اتصلوش بالمستشفى ليه؟

-         تقريبا فاكرين اني المفروض قاعد 24 ساعة جنب المريض عارفة لو سألوا على تشخيص أو ازاي يتعاملوا معاه كان عادي، المشكلة انهم فاكرين عشان انا المشرف على علاج ابنهم ابقى متاح 24 ساعة في اليوم حاجة تجيب الضغط

-         معلش أنا ح أعمل لنا كوبايتين شاي واتصل بإياد أكم عليه ايه رايك

-         تمام، مستني الشاي

يوميات مدرس

الحكاية الثالثة عشرة

يسر كتب كتابها الأسبوع اللي فات الحمد لله ومستريحة لجعفر ودي اهم حاجة. طبعا وحشتكم المدرسة بأخبارها، المدرسة مستقرة بعد حادثة رغدة والحمد لله، والأهم إني ما بقتش بهتم بيهم ولا رأيهم عدى التيرم واتشغلنا في جواز أختي يسر وتجهيز شقتها. هي دلوقتي حرم دكتور جعفر رسمي وبتكمل دراستها وأنا فعلا بقيت لوحدي تماما.

الوحدة صعبة بأرجع البيت مفيش فيه يسر كالعادة أقعد أتكلم معاها، وبدأت مرحلة الدروس الخصوصية عشان أضيع الوقت، وعدى التيرم الثاني بطيء من غير يسر في البيت. إحساس صعب انك تكون متعود على حد وفجأة تلاقيه مش موجود، كنت بأروح أزورها طبعا بس مش كتير هي لسه عروسة جديدة ومشغولة بالدراسة والبيت.

بس الحمد لله جعفر كان متعاون معاها رغم شغله ودراسته هو كمان بس ما كانش بيسيبها تقوم بشغل البيت لوحدها كان بيساعدها في كل حاجة ودايما يقول لي ان الرسول عليه الصلاة والسلام كان بيساعد أهل بيته وإحنا فين منه لما نقول مشغولين.

بجد ما كنتش عارف إن جعفر طيب كده غير لما اتجوز يسر، حبيبتي خلصت الجامعة الحمد لله وقدمت على دراسات عليا، وأنا بدأت الدراسة في السنة الجديدة.

السنة دي مختلفة الفصل فيه طالبات كتير، بس واحدة بصراحة خطفت قلبي فيه اسمها عبير، اللي حاليا حرم أستاذ اياد، عبير مجتهدة جدا وطيبة جدا خطفت قلبي من ساعة لما شوفتها بس لأني الأستاذ قررت أقول لنفسي ما ينفعش استنى لو عايز ترتبط السنة تخلص لأن أنت المدرس بتاعها وما ينفعش تكون الأستاذ والحبيب.

عبير قمحية اللون، محجبة، قوامها معقول لا هي بدينة قوي ولا نحيفة بين كده وكده، طويلة بس أقصر مني حبة، تشوفها لازم تعرف إنها مصرية، ذكية جدا عينها عسلية كنت بركز معاها في امتحانات الشهر والمجموعة، البنت مجتهدة ودايما الأولى على الفصل.

محدش قدر يتكلم عليا لأني أصلا كنت بتعامل معاها زي أي طالبة، محبتش إنها تعرف إني معجب بيها حتى.

استنيت السنة تخلص عشان أقدر أتقدم لها رسمي بس كنت خايف أهلها يرفضوا عشان فرق السن بينا أه مش كبير حوالي 8 سنين بس عارف وقررت أتكلم مع جعفر ويسر في الموضوع وأشوف رأيهم ايه

جعفر: اهلا اياد منورونا

يسر: كل دا طول الأسبوع أشوفك النهاردة بس، أومال فين وحشاني والبيت وحش من غيرك

اياد: بطلي بكش، انتي لسه عروسة جديدة ووراكي بيتك ومذاكرتك انتي وجوزك فبطلوا بكش بقى

جعفر: انت عارف ان اختك أستاذة في تنظيم الوقت وانت كمان بتوحشنا على فكرة ايه المشكلة لو عديت علينا كل يوم بعد المدرسة نتغدا سوا

اياد: بص منك ليها بلاش كلام مدرسة القرع المباشر دي اخترعنا احنا، انا جي النهاردة آخد رأيكم في موضوع كده

جعفر ويسر: خير يا ابني شكلك في حاجة كبيرة؟

اياد: قررت اتجوز

يسر جريت على اياد وحضنته: مبروك يا خويا مين سعيدة الحظ دي؟

اياد: دا سبب ترددي، طالبة عندي في الفصل اسمها عبير، البنت أخلاق ومؤدبة وشاطرة دراسيا جدا متوقع ليها مستقبل باهر ، بس خايف أهلها يرفضوني لأني أكبر منها ب 8 سنين وكمان هي لسه ثانوية عامة

جعفر: استنى لغاية لما النتيجة تطلع واطلب تقابل أهلها ، طول ما انت ساكت مش ح تعرف مفيش مشكلة من التجرية خصوصا شكلك وقعت خلاص

يسر: بتحبي يا بيضة ألف مبروك الظاهر اني كنت سبب تأخير جوازك يا عريس

اياد: ابدا بس محستش بالانجذاب اللي حسيته ناحيتها لحد قبل كده، رأيكم يعني استنى لغاية النتيجة واتقدم لها؟

يسر وجعفر: ايوة

وشكلي ح اسمع كلامهم وربنا يقدرني واستنى لغاية النتيجة عشان أروح أتقدم لأهلها، حبيتها ومش عارف امتى وازاي بس حصل خلاص.