في البداية احب اعتذر عن تأخير نشر الحلقات لانشغالي في معرض الكتاب، بس الحمد لله المعرض خلص ورجعنا تاني لليوميات
تاني حاجة أحب اتوجه بالشكر للدكتور جعفر محمد أخصائي الطب النفسي وعلاج الادمان لمساعدتي بالمادة العلمية في الحلقة النهاردة
الحكاية التاسعة
الحمد لله طبعا عدى موضوع هند على خير، وتوالت بعده مواضيع كتير مع أسماء
تانية والحمد لله بيثبت براءتي فيها، اللي فعلا مش عارفه هو ليه عشان مدرس صغير في
السن لازم أكون دنجوان؟! سؤال مش لاقي له إجابة حتى الآن.
المهم سيبكم مني خلينا بقى في نورا زميلة يسر، يسر كانت مهتمة جدا
بموضوع نورا خصوصا بعد ما عرفت ان وائل كان بيضربها ويهينها وهي لغاية النهاردة
بتحبه ومتعلقة بيه ومخنوقة انه ممنوع عنه الزيارة.
الصراحة ليا صديق دكتور نفسي اسمه جعفر سألته على الموضوع دا وشرحه لي
وقالي:
"المريض النفسي اللي بيتعلق بشخص لازم يكون
1- الاهل علاقتهم متوترة
ببعض ولكن الاب والام عايشين مع بعض وهنا المريض بيهرب بحد تاني يمثل له
الاستقرار، وأحيانا تانية بيهرب لحد يكون عقاب ليه لأنه ببساطه بيعاقب نفسه على
الخلافات بين اهله ويعتبر نفسه مسئول عنها.
2-
الاهل علاقتهم مدمرة ومنفصلين وهنا المريض بيعتقد داخليا انه السبب في
الانفصال وبيختار شخص فيه اكتر الصفات اللي بيكرها، لأنه بيعاقب نفسه.
حالة البنت اللي انت بتسأل عنها هنا هي بتعاقب نفسها عشان معتبرة انها
السبب في الانفصال والمشاكل بين والدها ووالدتها عشان كده اختارت الشخص دا وهنا هي
ادمنته لأنه دايما بيعاقبها والعقاب دا راحة ليها نفسيا، ودي مشكلة لازم تتعالج
وفي الغالب بتم عن طريق جلسات توجيه نفسي بتواجه المريض بالحقيقة وتضع أمامه
العديد من الخيارات والاحتمالات لو بعد عن الشخص دا والأهم إنها بتصحح اعتقاده انه
سبب المشاكل والانفصال بين الوالدين".
أياد: طيب وايه اللي بيوصلها للادمان؟
جعفر: الإدمان هنا نتيجة منطقية لأنها بتهرب بيه عن الواقع. دا طبعا
إلى جانب أن الواحد كتير
وهو ماشي في الشارع بيشم ريحة حشيش على القهاوى او يشوف صنايعية شغالين معاهم
ترامادول او حتى يطلبه منك موظف في إدارة حكومية عشان يخلصلك ورقة او يمشيلك مصلحة
ده غير العيال اللى بتقف على النواصي ويبيعوا مخدرات وساعات بنشوف ناس ماشية في
الشوارع او وسائل المواصلات ونحس انهم مبرشمين وبعدين تفتح التليفزيون تتفرج على
مسلسل تلاقى فيه بطل او اتنين على الأقل مدمنين وبرامج بتتكلم عن المخدرات وكل يوم
نسمع ان الحكومة قفشت تاجر مخدرات اوحتى قتلت تاجر مخدرات وكل واحد فينا وللأسف الشديد في جوه عيلته او حتى اسرته او
جيرانه حد مدمن او مات او في السجن او جاله مرض نفسي خطير وكل ده بسبب تعاطى
المخدرات، تصدق كمان ان انا شخصيا اخدت نصف قرص ترامادول من 7 سنين وانا في سنة
خامسة طب وكنت في قافلة طبية ساعتها عشان اسهر واركزومكنتش اعرف يعنى ايه ترامادول
ويعنى ايه مخدرات ولما عرفت قررت انى اتخصص في علاج الإدمان والطب النفسي.
اياد: انت بتتكلم جد؟
جعفر: أه والله بتكلم جد. طب تعرف ان في
احصائيات اتعملت كتير عن انتشار الإدمان في مصر مبنية على استبيانات طبية
واحصائيات من وزارة الداخلية والعيادات والمستشفيات الجامعية يعنى مثلا في
احصائيات بتقول ان نسبة المدمنين في مصر حوالى 8% واحصائيات تانية بتقول 10% واحصائيات
بتقول 15% واحصائيات بتقول ان حوالى من 60-80% من الناس في مصر اخدوا مخدرات ولو
لمرة واحده في حياتهم على الأقل، واحصائية اخرى قالت ان الادمان منتشر فى مصر
بنسبة 24% ده معناه ان المشكلة كبيرة واثارها خطيرة على الفرد والمجتمع تخيل معايا
لو مصر فيها 90 مليون انسان هيبقي فيهم 9 مليون مدمن وتخيلوا لو كل اسرة فيها عشرة
هيبقي منهم واحد مدمن ولو كل فصل فيه ستين طالب ستة منهم هيبقوا مدمنين ودى ارقام
تخلى الواحد يفكر ويتحسر خاصتا اذا عرفت ان نسبة انتشار الادمان العالمية هي
تقريبا 5-7% يعنى عندنا زيادة في نسبة المدمنين بنسبة حوالى 2-5%.
اياد: الأرقام دي تخوف يا جعفر، طيب
ايه هي أسباب الإدمان؟
جعفر: هو مبدئيا كده مفيش حد مدمن
بالصدفة ومحدش مدمن غصب عنه ومحدش مدمن عشان حد حطله حاجه لونها اصفر في العصير او
حد ربطناه في سرير وحقناه هيروين فبقي مدمن غصب عنه، لا وألف لا، الإدمان اختيار
الشخص بكامل وعيه وارادته وقراره طب يا ترى ايه هي الأسباب اللى تخلى حد عاقل يعمل
في نفسه كده؟
الأسباب كتير اوى وممكن نقسمها لأسباب اجتماعيه
وأسباب بيولوجية (يعنى خاصة بكمية الانسان ونفسيته هو)
أولا: -الأسباب الاجتماعية
المجتمع بيأثر في الفرد على اد الفرد ما بياثر
فيه بالظبط يعنى زى الشخص ما بيكون المجتمع، بيكون المجتمع هو كمان الشخص فأي حاجه
بتحصل من حوالينا بتأثر فينا واحنا مهما كان دورنا في المجتمع صغير او كبير برضوا
لينا عليه تأثير مهم وخطير
1-الاسرة: تخيل كده واحد ابوه تاجر
مخدرات او امه تاجرة مخدرات او مدمنين او بيشوف اخوه بياخد مخدرات او ابوه مطلق
امه او ليل نهار يضربها او يضرب فيه هو نفسه او حتى اهله بيسيؤا تربيته او مودهوش
مدارس، الحالة اللي انت قلت لي عليها الاب بيضربها ويهينها ويهين أمها وهي حاسة
انها السبب فالمخدرات لما قدمها حبيبها قبلتها منه بقرار واعي منها، وعشان كده
كانت عرضة كبيره لأنها تبقى مدمنة في أي يوم من الأيام
2-المدرسة:- العيال بتروح المدرسة عشان
تتفق مع المدرسين على الدرس الخصوصى وشكرا على كده لا في تربية حقيقية ولا تعليم
حقيقي ولا توجيه ثقافي عشان كده معدل أداء الطلاب بيقل بشكل يخلينا نفكر من جديد
في التعليم والمدرسة كلها، انت عارف ان في أطفال بيتعلموا شرب السجاير وهما في
المدرسة الابتدائي والحشيش في إعدادي والتامول في ثانوي
3-انتشار المخدرات وسهولة البيع والشرا:-
لدرجة ان كل شارع او مربع سكنى بقي ليه الديلر بتاعه ! وان أماكن تجارة المخدرات وأحيانا
تجار المخدرات بقوا معرفين بالاسم للناس وحتى للحكومات
4- الاعلام :- انتشار نماذج المدمنين
في الاعلام ده على فكرة سلاح ذو حدين ساعات بيبقي مفيد لما يتعرض صح وبشكل عميق
وساعات بيبقي سطحى ولمجرد حشو الفيلم او المسلسل بصورة مدمن مع واحدة رقاصة اهو
عشان الجمهور يتبسط وكله لزوم اكل العيش، حتى كمان الاعمال الفنية اللى بطلها مدمن
او احد ابطالها بتجيب جزئية انهيار المدمن او عقابه في اخر شوط من اخر مشهد في
الفيلم اهو يعنى عشان يبقى عمل اللى عليه فالمشاهد يفتكر شكل السرنجة وشكل الدماغ
وشكل الكاس والحبه وما يخدش باله ان البطل اتعدم او اتقلبت بيه العربية في اخر جزء
من الثانية في الفيلم مع ان المدمن حياته بتبدأ في الانهيار من اول سرنجة او شمه
او حباية .
5-الاحباطات المادية والعملية والعلمية:-
دي بتخلى الواحد هيطلع من هدومه وبتخليه عاوز يبسط نفسه باى شكل
6-مشكلة النخبة: - بينى وبينك احنا
عندنا مشكله كبيره اوى في النخبة في بلدنا ياما النخبة بتدور على لقمة عيش تاكلها
ومش فاضية يا اما النخبة عندها مصلحه خاصة بتنفذها عشان تشبرق نفسها او تكون النخب
هي ذات نفسها هي اللى بتبيع مخدرات وبتسترزق منها
ثانيا :-أسباب بيولوجية ونفسية
1- الوراثة : يالهوى هو الإدمان فيه
وراثه ؟ اينعم لو الام حامل وبتاخد مخدرات مثلا العيل ممكن يورث منها ده او حتى
يتولد مدمن لان المخدرات وصلت لدماغه وهو جنين زائد ان كمان في بعض الدراسات الى
اتعملت ورجحت انتشار تعاطى المخدرات في بعض العائلات اكتر من عائلات تانية
2-
وجود اضطراب في الشخصية :- يعنى في اضطرابات او سمات شخصية بيكون أصحابها
عرضة لتعاطى المخدرات اكتر من غيرهم زى مثلا الشخصية السيكوباتية او المضادة
للمجتمع او الشخصية الحدية او الاعتمادية او التجنبية وغيرهم من الأنماط في دراسة
قالت ان حوالى(35-60%) من المدمنين دول أساسا شخصيات سيكوباتية او شخصيات مضادة
للمجتمع او اشرار يعنى
3- وجود مرض نفسي زى القلق او الاكتئاب
او الرهاب والفوبيا: العيان ساعتها بياخد مخدرات عشان يخفف معاناته النفسية ثم تخف
معاناته النفسيه ثم يبقي مدمن ومش عارف يستغنى عن المادة المخدرة ثم يروح يتعالج
ونوقف المخدرات ثم يكتئب في اعراض الانسحاب ثم ينتكس ويتنيل على عينه ويرجع
للمخدرات تانى وشغلانه طويله
4- وجود أفكار روشه كده في المجتمع: زى
مثلا ان الترامادول مش مخدر وان ده منشط وفيتامين وان الحشيش مش مخدرات او ادمان
او ان الخمرة كل أسبوع في الاجازة عمل مفيد اجتماعيا او ان جرعات كبيره من اى مخدر
هي اللى بس ادمان لكن انا لو اخدت كل يوم نص حباية او حباية مش هيحصل حاجه وهبقي
برنس في نفسي وذاتى ومش هبقي مدمن ابدا ابدا استغفر الله العظيم وأفكار تانية مثلا
انى اشرب حشيش او اخد مخدرات زى التامول عشان الجنس يبقي أطول واتبسط اكتر او ان
التامول هيخلينى اذاكر او ان التامول هيخلينى اصحى الصبح بدرى وانزل اشتغل وابقى
قوى في الشغل او ارفعلى حبايتين اباتريل عشان اعرف اتعامل في اى حوار او خناقة ان
شاء الله
5-في ناس تانيه يكون عندها مشكلة طبية
فيتوصف ليها مهدئات او ترامادول فبدل ماياخد المادة الطبية حسب روشتة العلاج من
الدكتور، تعجبه المادة المخدرة فيفضل مستمر عليها على طول وبعدين يجيلى العيادة
وعينه في الأرض ودمعته على خده ويقولى الدكتور عديم الضمير والإنسانية هو اللى
كتبهولى منه لله
6- أصدقاء السوء :- كل واحد فينا عنده
واحد صاحبه صديق سوء انسان غاب طويل الناب بيقعد معاه قاعده طرية ويفضلوهم برطمان
مخدر على قرشين تلاته حشيش
اياد: كل دا، طب تفتكر أخاف على يسر من
نورا وامنعها عنها والا اعمل ايه؟
جعفر: رأيي تبعدها عنها لأنها سهل تتجر
عن طريق مدمن للمخدرات، الأول حب التجربة أو انه عادي بعد كده صعب تبطل
اياد: شكرا يا جعفر انك فهمتني أنا ح
أفهم يسر وأقنعها تبعد عن نورا دي وكفاية اللي عملته معاها لغاية كده.
جعفر: تشكرني على ايه، وفعلا الأفضل ابعد
يسر عن نورا، الا صحيح هي يسر في سنة كام دلوقتي؟
اياد: اخر سنة في الجامعة
جعفر: هي ارتبطت ولا لسه؟
اياد: لسه، خير عندك عريس ولا ايه
جعفر: آه أنا
اياد: مين؟
طبعا كانت مفاجئة ليا كبيرة/ جعفر صحبي
وحبيبي وأكبر من يسر بخمس سنين بس، بس أنا عمري ما فكرت انه ممكن يتجوز يسر، مش
عارف اعمل ايه
اياد: بص يا جعفر انت فاجئتني بطلبك
النهاردة، أنا محتاج أفكر وكمان أخد رأي يسر
جعفر: طبعا حقك، لو وافقت أكون شاكر
تحدد لي ميعاد اجيب الاسرة عشان الارتباط يبقى رسمي
